【又有新音響？】
早年睇戲片頭見到有DTS音響都會好興奮（火車頭、直昇機飛入城市、峽谷回音、打鼓片頭，有記錯歡迎指正...又暴露咗自己年齡添），因為當年被公認係音響效果最佳指標，到後期DVD如果有分Dolby5.1或DTS聲軌，諗都唔駛諗一定係聽DTS，甚至覺得冇DTS成件事係唔抵嘅，因為音色點都係清過Dolby5.1好多。
不過，近年好似大家都忘記咗DTS。Dolby愈玩愈多花神，Dolby 7.1聲道片頭「彈波波」嘅「All around you」由好震撼聽到都冇乜感覺，而Dolby玩到Atmos更成為戲院新寵兒（乘機可以加價... 丫唔係，我指可以乘機「翻新」一下），搞到近年都唔記得咗有DTS呢樣嘢。
估唔到呢個時候，突然彈出一樣叫DTS:X嘅系統！
翻查網站，DTS:X有別於一般聲軌導向，係由物件導向去呈現畫面入面嘅唔同物件聲效，唔止大型動作特技片先發揮到，連普通喜劇或文藝片都可以運用到呢種音響效果。小弟行外人，憑字面理解就係大概咁嘅意思。
請問各位音響專家，有冇人試過呢種DTS:X版（用普遍人類理解嘅文字分享一下丫）？
Search